Nakahibalo kita nga obsessed ang mga arsonists sa kalayo, apang ang 26 anyos nga si James Brown halin sa Northumberland, sa United Kingdom ang obsessed sa mga bombero kag indi sa kalayo.
Luyag ni Brown nga mangin bombero apang wala sini nakuha ang gusto nga propesyon kag nagpabilin nga mag-idolo na lamang sa mga ini kun sa diin masami sini nga ginatawagan ang fire department apang sang wala na ini makuntento, ginsunog sini mismo ang iya kaugalingon nga balay agud makita lang ang mga bombero.
Nagtawag si Brown sa fire department kag nagreport nga may yara sang sparks nga makit-an sa electricity meter kag pag-abot sang firefighters ila gintapna ang gamay nga kalayo kag ginpatay ang electricity supply.
Matapos ang 90 minutos, liwat nga nagtawag si Brown sa fire brigade para magreport sang fire incident kag pag-abot sa area gintapna sang firefighters ang kalayo nga yara sa iya katre nga suno kay Brown halin man sa gihapon sa electricity meter.
Apang, wala ginbaton sang mga bombero ang rason bangod nakapatay man ang kuryente sa balay.
