Patay ang 53 anyos nga lalaki matapos ginluthang sang iya tiyo sa Sitio Bulwang, Barangay Biao, Binalbagan, sang Huwebes, alas- 10:30 sang gab-i.
Ang biktima ang ginkilala nga si Jonas Escañan, 53 anyos, single, mangunguma samtang ang suspetsado naman ang ginkilala nga si Henny Ganzon, lalaki, 61 anyos kag lunsay mga residente sang So. Bulwang, Brgy. Bi-ao, Binalbagan.
Sa interview sang Bombo Radyo Bacolod kay Police Major Jun Ray Batadlan, hepe sang Binalbagan Municipal Police Station, magka-upod nga naga-inom sang makahulubog nga ilimnon ang magtiyo sang nagka-argumento ang duha.
Suno diri, may nagluntad nga komosyon kun sa diin ginsaway sila nga duha sang ila man mga abyan.
Nag-una pauli si Escañan apang siya ang ginsundan sang iya tiyo kag ginluthang.
Ginalantaw naman nga motibo sa pagpatay amo ang away sa duta.
Sa karun napasakaan na sang kaso ang tiyo nga si Ganzon.
