Ginsaysay sang nagatrabaho sa kampo kun paano nasapwan ang mga bangkay sang duha ka mga lalaki sa Hacienda San Roque, Barangay Cubay sa ciudad sang La Carlota, Negros Occidental kahapon sang aga.
Sa interview sang Bombo Radyo Bacolod sa duha ka mga nagatrabaho sa kampo, ang una nga bangkay ang nasapwan sang nagaroving sa kampo bangud sa nakita nga nahapay nga tubo.
Ginsulod sang duha ang kampo kun sa diin nakita nila ang bangkay sang lalaki sa nawala nga bahin sang Hacienda road, nga nalubong sa duta sang kapin isa ka tapak.
Bangud sa nakita nga nahapay nga mga tubo, gin-usisa pa sang duha ang lugar tubtob makita ang isa pa ka bangkay sang lalaki sa natuo naman nga bahin sang lugar, nga may kapin 50 metros nga distansya gikan sa una nga bangkay.
Ang una nga bangkay ang may tattoo sa nawala nga abaga, ginbaklid kag may gapos sang alambre kag ginbusalan man ang bibig sang duct tape, samtang ang isa ang ginputos naman sa trapal.
Gilayon man nga nagtawag sa kapulisan ang duha agud ipahibalo ang angot sa nasapwan nga mga bangkay.
Ang duha ka mga bangkay ang ginkilala sang ila mga kalive-in nga sanday Ernesto Jawud, alyas Atong, 32 anyos kag Glenn Arnaiz, alyas Follow Up, 29 anyos, lunsay mga residente sang Barangay 6, Bacolod City.
Personal man nga ginpadulungan sang Bombo News Team ang lugar kun sa diin personal nga nakita ang nagkalahapay nga tubo kag may yara pa sang tinulo sang dugo nga nabilin sa mga dahon.
Ang nasapwan nga mga lalaki ang nakitaan sang mga lagob sa lawas nga ginalantaw inagyan sang pagpangastigo.
Ginalantaw nga madamo ang nagkastigo sa ginlubong nga bangkay bangud indi man masarangan sang isa ang paghimo sini bangud sa kadakuon sang lawas sang biktima.
Nahibaluan nga sa kalapit lamang nga area sadto nasapwan ang bangkay ni Pearl Joy Galve, ang dalagita nga residente sang Barangay Sum-ag, Bacolod City tinalikdan nga tuig.
Ginpahayag man sang duha nga ang lugar ang wala masami ginakadtuan bangud magluwas nga wala sang suga, masim-ong man kag malayo sa mga pamalay.
