Nagpadala na sang sulat ang Commission on Election – Negros Island Region sa Department of Energy angot sa seguridad sang power supply sa May 12 Midterm Elections.
Sa interview sang Bombo Radyo Bacolod kay Atty Jossil Macute, sa consultative meeting sa National Grid Corporation of the Philippines, nagpasalig ang mga local power supplier nga wala sang brown-out isa ka semana antes sang eleksyon kasubong man inadlaw matapos sang piniliay.
Apang sa Final Testing and Sealing (FTS) sang mga Automated Counting Machines (ACMs) kahapon, may pila ka lugar nga naka-eksperyensya sang brownout.
Ginapakamaayo na lamang ni Macute nga isa ka oras lamang ang maximum nga kalawigon sang brownout.
Suno diri, gilayon man mga gintawagan sang mga concerned Provincial Election Supervisors ang local power suppliers, bangod una na nga nagpasalig ang NGCP nga sila ang natapos sa rehabilitation sang transmission lines, gani ginalantaw nga yara sa local power supplier ang problema.
Apisar nga nahangpan nila nga indi malikawan kun kis-a ang problema, apang may Memorandum of Agreement na ang mga ini nga ginpirmahan ilabi na nga crucial katama ang bastante nga power supply sa eleksyon.
Sa consultative meeting, gin-emphasize man sang comelec nga indi lamang election day kinahanglan masecure ang power stability, kundi kasubong man pila ka adlaw antes kag pagkatapos sang eleksyon.
Suno kay Macute, ang adlaw matapos sang eleksyon ukon Mayo 13 ang isa sa pinakacrucial bangod sa canvassing sang boto kag transmission sang data kasubong man ang proclamation of winners.
