Nagpaandam ang Commission on Elections sa publiko batok sa online post nga nagagamit sang ila pangalan kag logo nga nagapahayag nga nagakinahanglan sila sang mga poll watcher kag machine operators nga may sweldo nga P4,000 para sa palaabuton nga Eleksyon sa Lunes, Mayo 12.
Suno sa Comelec, fake news ang graphics nga nagalapta sa karun sa social media natuhoy diri kag wala sang opisyal nga anunsyo nagikan sa Comelec.
Sa idalum sang Article III sang Comelec Resolution No. 11076, gin-eksplikar sang komisyon nga ang mga poll watchers ang magagikan sa political candidates, partylists ukon accredited citizens’ groups.
Suno sa ahensya, wala sila ginhire sang gobyerno bilang regular nga mga empleyad kag wala sang bayad nagikan sa gobyerno magluwas lamang kun ini ang maathag nga gintalana sang layi ukon mga pagsulundan.
Nagpahanumdum man ang Comelec sa publiko nga indi maghatag sang ila personel nga impormasyon sa mga indi verified posts kag ireport ang mga kaangay nga posts sa otoridad.
