Nagpasalig na ang pamilya sang tatlo nga kaupod sang nagbuno sa 18 anyos sa Barangay Mandalagan, Bacolod City matapos ang nagluntad nga rambol, nga ila igasurrender ang ila mga kabataan.
Madumduman nga napatay si Hakiru “Yuri” Legaste, 18 anyos, residente sang Barangay Efegenio Lizares, Talisay City, matapos mabuno ni Adrian Cagayao sang makaduha ka beses.
Ini ang resulta sang pagsuyaay nga nagdangat sa rambol, kun sa diin si Cagayao ang una na nga nagsungka sa Bacolod City Police Office kag ginturn-over sa kustodiya sang Bacolod Police Station 3.
Apang magluwas kay Cagayao, kaupod man nga ginpasakaan sang kaso nga homicide ang tatlo pa sini ka kaupod.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, may identity na sila sang tatlo nga may edad nga 20 tubtob 22 anyos.
Suno diri, magkaingod lamang sang balay ang mga suspetsado gani una na nga nagkasugot ang mga ginikanan nga isurrender ang ila bata.
Wala naman ginbuyagyag sang mga ini ang oras kag petsa sang pagsungka bangod sa kahangawa.
Pahayag sang mga ini nga atubangon nila sa korte ang kaso.
Samtang ginaproseso naman sang Cista Bar ang ila nga business permits.
Ang nasambitan nga bar ang ginhalinan sang mga kabataan, antes ang natabo nga rambol.
Nahibaluan nga boluntaryo nga nanirado ang establishimento matapos matukiban nga sila ang wala makarenew sang business permit.
Gina tsekyar man ini sang kapulisan agud maseguro nga nagatuman ang negosyo sa compromise agreement.
Pahanumdom ni Tapang nga dapat tanan nga places of convergence kaangay sang bar ang maseguro nga may nagakaigo nga permits, agud indi na mangin venue sa pag-inom sang mga kabataan.
