Nastranded ang pila ka mga Negrosanon sa Palawan matapos nga ginpabay-an sang ila recruiter.
Sa interview sang Bombo Radyo kay Ronel Batayola, pito sila tanan nga Negrosanon ang nagpadulong sa Palawan matapos nga may nagtanyag sa ila nga isa ka recruiter sa ciudad sang Bacolod nga may yara sila sang trabaho bilang construction worker.
Suno diri, sang Marso 26 sila naghalin sa Bacolod City kag nagtinir sa Manila sa sulod sang duha ka adlaw kag amo na nga nagbyahe sila padulong sa Palawan.
Pag-abot didto may yara sang balay nga ginhatag sa ila agud tiniran apang nagalakat sila sang tunga sa oras agud makasaka sa bukid kun sa diin sila matrabaho.
Tuman ang ila kakibot sang mahibaluan nga naglain ang patakaran nga ginhambal sa ila sa Palawan sang sa ginsugid sa ila sang recruiter.
Humalin sang nagtrabaho sila, wala nahatag ang ila kumpleto nga sweldo kag naga-cash advance lang.
Nabudlayan man sila bangod kulang ang ila kwarta, dako ang ila utang kag wala pa sila nakapadala sang suporta sa ila pamilya.
Nangayo sila sang bulig tubtob nga nakalab-ot kay Bacolod City Mayor-elect Greg Gasataya ang ila sitwasyon.
Ginhatagan sila ni Gasataya sang bulig kag sa karun nakahalin na didto sa Palawan.
