Tinutuyo sang Department of Information and Communications Technology (DICT) ang paghimo sang 8 million digital nga trabaho sa masunod nga tatlo ka tuig, sa idalom sang ila programa nga “Trabahong Digital.”
Ginlunsyar sang DICT ang nasambit nga initiative agud mapalapnag ang internet connectivity sa bug-os nga pungsod kag mahatagan sang bastante nga digital skills ang mga Pilipino.
Suno kay DICT Secretary Henry Aguda, ang pagduso sang isa ka digital-first economy ang magahatag dalan sa mas madamo nga oportunidad sa trabaho kag pagsanyog sang negosyo pinaagi sa pagpabaskog sang digital skills sang mga Pilipino.
Kumpiyansa ang DICT nga malab-ot ang tinutuyo sa bulig sang aktibo nga pagbinuligay sa nagkalain-lain nga sektor kasubong sang gobyerno, mga academic institutions, kag pribado nga kumpanya.
Tinutuyo sang “Trabahong Digital” indi lamang ang job generation kundi ang paghatag sang mga kinahanglanon nga kagamitan kag ihibalo sa mga Pilipino agud mangin kabahin sang nagalapad nga digital economy.
