Ginbatak na sang Department of Agriculture (DA) ang ginpatuman nga pag-ban sa importasyon sang mga domestic kag wild birds lakip na ang poultry products halin sa Belgium.
Ini kasunod sa kumpirmasyon nga na-contain na ang avian flu outbreak sa European country.
Sa Memorandum Order No. 30, suno kay Agriculture Secretary Francisco Tiu Laurel Jr. wala na sang may narekord nga bag-o nga kaso sang bird flu humalin sang Pebrero 28.
Suno diri, naka-comply ang Belgium sa guidelines nga gin-set sang World Organization for Animal Health (WOAH) sa pagdeterminar kun hilway na sa Highly Pathogenic Avian Influenza (HPAI) ang pungsod.
Madumduman nga gin-set ang trade restriction sang Pebrero 17 bangod sa outbreak sang highly pathogenic avian influenza (H5N1) sa Sint-Niklaas, Oost-Vlaanderen.
