Indi magpatuman ang Department of Agriculture (DA) sang import ban sa bugas bangod sa pagpamahog nga dala sang ginapaabot nga El Niño sa ulihi nga bahin sang tuig.
Suno kay Agriculture Secretary Francisco Tiu Laurel Jr., wala sang rason nga ipatuman ang import ban sa tunga-tunga sang Nobyembre kag Disyembre.
Samtang nagapreparar ang pungsod para sa palaabuton nga harvest season, nagdangat na sa 3.3 million metric tons ang kabug-usan nga gin-import nga bugas sa Pilipinas, base sa pinakabag-o nga data sang ahensya.
Dugang pa ni Tiu Laurel nga kinahanglan mapasanyog ang buffer stock sang bugas agud masiguro ang suplay sa tion sang pinakabaskog nga epekto sang El Niño.
Apisar sini, ginpasiguro sang DA nga indi nila pagpahanugotan nga magnubo ang farm-gate price sang humay bangud sang mas dako nga volume sang imported nga bugas.
Pahayag ni Tiu Laurel, handa ang National Food Authority (NFA) nga magbakal sang 500,000 ka tonelada sang humay halin sa mga lokal nga mangunguma.
