Nagapati ang labor advocate nga patay na ang hagna para sa wage increase kag ini ang hungod sang mga mamalidha.
Sa interview sang Bombo Radyo Bacolod kay Wennie Sancho, secretary general sang General Alliance of Workers Association (GAWA), parehas nga nagpatumbaya ang House of Representative kag Senado.
Suno diri, gin-una sang mga mamalidha ang interes sang mga makagagahom ukon negosyante.
Samtang wala na nila ginasapak ang pag-antos sang working sector.
Pahayag ni Sancho nga ginpasalig lamang sang mga mamalidha ang mga mamumugon nga pasakaan ang sweldo, apang hungod nga wala gintrabaho ang hagna agud indi mahingagaw sa pagtakop sang 19th Congress.
Nahibaluan nga magasarado na ang 19th Congress sa Hunyo 30 kag tanan nga mga hagna nga wala matapos ang magabalik gid sa umpisa ukon irefile sa pagsugod sang 20th Congress.
Una na nga nagpasar ang Senado sang P100 legislated wage increase, samtang sang damlag lang, ginpasar man sang Kamara ang P200 legislated wage increase.
Ang duha ka version ang sa karun ginabalay pa sang Bicameral Conference Committee antes mapasaka sa Office of the President.
Nakadepende naman sa Presidente kun aprubahan nga mangin layi ukon i-veto ang hagna.
Apang sa paglantaw ni Sancho, nga nagserbe nga collateral damage ang wage hike petition sa political drama sa karun sang both houses.
Suno diri, kun plano gid nga mapatuman ang promisa sa mamumugon nga mapasaka-saka man ang purchasing power sa pihak sang segi-segi nga pagsaka sang bili sang produkto kag serbisyo, kuntani ini ang gin-umpisahan sa P100 lamang kag temprano nga gintalakay.
Apang ang hungod nga pagpatumbaya sa hagna, ang nagapakita nga mas ginapaburan ang bahin sang management sangsa mamumugon.
