Padayon ang pagbaligya sang P20 kada kilo sang bugas sa ciudad sang Bacolod.
Sa interview sang Bombo Radyo Bacolod kay Brenda Burdeos, Project Development Officer IV sang City Cooperative and Livelihood Development Office (CCLDO), sa 61 ka Barangay sa ciudad, 27 na ang nakabaligya sang P20 per kilo sang bugas.
As of June 4, 3,686 na ka sako sang bugas ang nadeliver sa ila kag 3,530 diri ang nadispose na.
Ang brgy nga natapos na amo ang Barangay 1, 2, 3, 6, 9, 12, 7, 17, 19, 25, 29, 33, 5, 22, 24, kag 4 kag 25 bwas nga adlaw.
Natapos naman ang Barangay Singcang, Tangub, Cabug, Handumanan, Mansilingan, Alijis, Taculing, Banago, Mandalagan, Estefania, Alangilan, kag Villamonte bwas nga adlaw.
Iban nga Barangat nagalimita lang sa pagbaligya sa lima ka kilo kada panimalay agud maka-avail man ang iban.
Suno diri, wala pa sila nakabati nga may nagreklamo nga indi makasaho sa bugas nga nabakal nila.
Sa pihak nga bahin, ginpahayag sang rice vendor sa Burgos Public Market nga ang ikaduha nga stock sang ginabaligya nga P20 per kilo sang bugas ang indi kaangay sa una nga nag-abot.
Sa interview sang Bombo Radyo Bacolod kay Beltran Villanueva, ang una nga nag-abot nga stock nga ginbaligya sa ciudad ang wala sang baho apang matig-a lang kun tig-angon samtang ang ikaduha nga stock nga ginabaligya sa kada brgy, ang malubog na kun sa diin indi na ini kaangay sa una nga stock.
Samtang para sa Punong Barangay sang Barangay Mandalagan nga maayo ang bugas nga ginpadala sa ila Barangay para ibaligya sa P20 kada kilo.
Suno kay Punong Barangay Paul Anieve, nalipay ang mga residente nga nakabakal sang barato nga bugas manami pa.
Suno diri, ang bugas nga ginabaligya sa P20 kada kilo amo ang mahal nga bugas apang ginbakal sang gobyerno agud mabaligya sang barato sa pumuluyo.
Dugang pa sini, madamo pa sang nagreklamo nga wala naka-avail.
Samtang, nagpanawagan naman ang pila ka residente nga kun tani mabaligya man sang P20 kada kilo sang bugas sa kada purok bangod malayo na sa ila nga magbyahe pa.
