Nangin mabug-at ang lakat sang trapiko sa ciudad sang Bacolod kahapon sang hapon bangod sa baha tuga sang pagbubo sang ulan.
Nagbubo ang ulan pasado alas- 3:00 sang hapon kun sa diin may iban nga bahin sang ciudad ang ginbaha.
Madasig nga nagsaka ang tubig sa Purok Carvic, Brgy Mandalagan kag ginbaha man ang dalan Lacson amo nga nangin mabug-at ang lakat sang trapiko.
Samtang, ginsulod naman sang tubig ang pila ka mga balay sa Country Homes Subdivision, Barangay Estefania, Bacolod City.
Kapin alas- 6:00 sang gab-i amo na nga nagsubside ang tubig.
Sa interview sang Bombo Radyo Bacolod kay Jose Antonio “Jojo” Robello, deputy head sang Bacolod Transportation and Traffic Management Department (BTTMD), nakita sini nga nagalakat man ang trapiko apang tuman gid kahinay.
Suno diri, iya ginalantaw nga rason kun ngaa madasig ang pagsaka sang tubig amo nga posible madamo sang basura nga nagasupon sa tamburong.
Magakoordinar ini sa Department of Public Works and Highways (DPWH) sa pagpatigayon sang declogging sa mga tamburong.
