Liwat naman nga nagpanakop sang colorum nga tricycle sa ciudad sang Bacolod ang katapo sang Bacolod Traffic and Transport Management Department (BTTMD).
Sa interview kay BTTMD Officer-in-Charge Atty. Reuben Sabig, nag-umpisa na sila sa pagpanakop sang mga colorum ukon wala sang nagakaigo nga dokumento sa pagbiyahe sang natapos na ang Business One Stop Shop.
Suno kay Sabig, colorum ang ila nga ginpangdakop bangud ini ang pinakaimportante kag ila nga operasyon ang nakabutang sa anti-towing ordinance sang ciudad.
Sa ila operasyon may 49 na sila nga nagkaladakpan.
Dugang pa sini nga ginadalian man nila kasubong man sang mga kapulisan nga matapos ang impounding area sang ciudad agud nga masaylo man ang mga salakyan nga nadalahig sa mga kaso.
Suno diri sa tion nga matapos ang impounding area maga-operate sila halin sa downtown padulong sa dalan Lacson tubtob sa Ayala.
Ginalantaw nila nga kun mag-operate sila nga wala pa natapos ang impounding area tuman na kalayo sa impounding sa Alijis kag mahimo nga may madisgrasya pa kun guyuron padulong didto ang naimpound nga tricycle halin sa downtown padulong sa dalan Lacson tubtob sa nasambit nga isa ka mall.
Ginauna man sang BTTMD panakop ang mga colorum nga tricycle agud nga mabuligan man ang mga tricycle nga nagabiyahe nga nagkuha sang mga permits.
Ginpahayag man sini nga tuman ka damo ang colorum kag sa mga nagabiyahe sa ciudad 30 tubtob 40 porsyento ang wala sang permit.
