Pabor kag magasunod ang United Negros Drivers and Operators Center (UNDOC) kun ipatuman sang Land Transportation Franchising and Regulatory Board (LTFRB) ang piso nga pagsaka sa pletehan.
Sa interview sang Bombo Radyo Bacolod kay UNDOC Secretary General Diego Malacad, nga amo man ang Presidente sang Negros Bacolod Delta Transport Corporation, tuman ka dako ang natalana nga pagsaksa sa presyo sang kada litro sang diesel sa masunod nga semana, nga mahimo magdangat sa P5.
Suno diri, kun 15 litros ang makonsumo sang isa ka jeep sa kada adlaw, magadangat sa P75 ang madula sa ila nga bulugasan.
Apisar nga kulang ang piso nga saka sa plete, ini ang makabulig man sang gamay sa mga drivers.
Suno diri, panawagan nila nga kuntani iparehas sa modernized jeepneys ang rate nga P15 ang minimum fare.
Aminado man ini nga may mga commuters nga magareklamo, gani ginarekomendar na lamang sini nga magtukod man sang grupo nga amo ang magapanawagan sa gobyerno.
Sa pihak sini, panawagan ni Malacad nga padasigon ang implementasyon bangod indi nila luyag nga magbalatian ang mga drivers nga nagabaka-baka sa byahe apang pierde ang kita.
