Gina-alegar nga nalakip ang isa ka babayi nga “showbiz personality” sa kaso sa pagkadula sang masobra sa 100 ka mga manug-bulang.
Sa affidavit ni alyas “Totoy” nalakip ang female showbiz personality sa mga pangalan nga may kaangtanan sa missing sabungeros.
Madumduman nga si alyas “Totoy” ang isa sa ginasaligan sang gina-alegar nga mastermind sa pagpatay sa mga biktima.
Suno diri ang mga nagkaladula nga sabungero ginkuga gamit ang alambre kag ang ila bangkay ginhigot sa mga sako nga may unod nga balas kag ginhaboy sa Taal lake.
Suno pa diri, isa sa mga suspek amo ang isa ka female showbiz personality nga wala anay sini ginhingadlan.
Wala naman gindetalye ni alyas “Totoy” kun ano ang papel sang showbiz personality apang suno sa iya dapat malakip ini sa 30 ka pulis kag mga sibilyan nga ginhingadlan sini nga dapat kasohan.
Pahayag ni alyas “Totoy” nakahanda na ang iya affidavit apang iya lang ini ipasa kun kumpleto na ang iya gina-uyatan nga ebidensya kag kun yara na ang mga testigo nga makapamatuod sa iya mga alegasyon.
