Wala pa sang identity ang bangkay sang lalaki nga nasapwan sa Hda, Bernabe, Brgy. Salvacion, Murcia, Negros Occidental.
Sa interview sang Bombo Radyo Bacolod kay Police Major Sherwin Fernandez, Chief of Police sang Murcia Municipal Police Station, ang bangkay ang nasapwan sang isa ka nagaarado sa kampo.
Interview clip with Police Major Sherwin Fernandez
Suno kay Fernandez, samtang nagaarado ini may yara siya sang napamanimahuan kag ginsuspetsuhan nga ginlubong nga tawo apang una gindumdom sini nga patay nga sapat lamang gani ginreport niya ini sa tag-iya sang kampo kag ini man ang nagreport sa mga kapulisan.
Gilayon man ini nga ginrespondehan sang mga kapulisan agud nga mausisa kag maimbestigaran kun sa diin nakumpirmar nga ini ang bangkay sang isa ka lalaki.
Suno sa hepe ang bangkay sang isa ka lalaki ang nagakaagnas na apang nagasuksok ini sang underwear kag 5’7 ang kataason.
Ang bangkay ang gin-alegar nga ginhungod nga ginlubong sa kampo kag ini nasapwan 20 metros ang kalayuon nagikan sa access road.
Ang dalan ang masami naman nga ginaagyan.
Ginabanta mga napulo tubtob 15 na kaadlaw ang bangkay ang yara sa kampo antes ini nasapwan
Wala naman sang traces sang krimen nga makita sa lugar bangud napanas na ini bangud sa pag-inulan sang nakaligad nga adlaw kag matag-as naman ang gintanom nga tubo
Naproseso naman sang operatiba sang Scene of the Crime Operation (SOCO) ang bangkay kag nadala sa punerarya.
Wala man sang reported nga missing person sa banwa gani indi nagikan sa banwa ang biktima.
Ang kamot ang yara sa likod ang wala nakahigot.
Wala naman sang makita nga tattoo bangud nagakadunot na ang panit sini.
Nagapanawagan man si Fernandez sa publiko kun sin-o ang may himata nga wala nakapauli nga makig-angot lamang sa Murcia Municipal Police Station.
Padayon sa karun ang imbestigasyon sang mga kapulisan angot sa nasapwan nga bangkay.
