Ginahulat nalang sang mga kapulisan sa Don Salvador Benedicto Municipal Police Station ang desisyon sang pamilya kun magpasaka sang kaso batok sa manghod nga nagbuno-patay sa iya magulang sa Purok Pakighi-usa, Barangay Pinowayan, Salvador Benedicto, Negros Occidental sang Hulyo 12 sang gab-i.
Ginkilala ang mga biktima kay Arnel, 50 anyos, mangunguma samtang ang suspetsado naman ang ginkilala kay Edgar, 30 anyos kag isa man ka mangunguma.
Sa interview sang Bombo Radyo Bacolod kay Police Major Ryan Villasario, hepe sang Don Salvador Benedicto Municipal Police Station, ginapreparar na sang mga ini ang mga dokyumento para sa inquest matapos nga nagsungka ang suspect.
Suno kay Villasario, ginpahayag sang pamilya nga tapuson nalang ang paglubong sa biktima antes ang pagpasaka sang kaso batok sa suspetsado.
Posible nga homicide ang ipasaka nga kaso batok sa suspek.
Suno sa hepe kun indi pa ka desisyon ang pamilya matapos ang reglementary period, ang suspect ang ila nga pagwaon.
Madumduman nga nag-inum sang makahulubog nga ilimnon ang tatlo ka mag-utod nga sanday Arnel, Edgar kag Ernesto sa Barangay Proper sang nasambit nga banwa kag sang sang papauli na nag-una ang magulang nga si Ernesto kag samtang nagalakat pauli nakabalikid ini kag nabatian nga may komosyon kag nakita sini nga ginbuno na ni Edgar si Arnel.
Gilayon man nga nagpangayo sang bulig si Ernesto apang pagbalik niya patay na si Arnel.
Gilayon man nga nagsungka si Edgar sa mga kapulisan kag nagpahayag nga naghinulsol ini sa iya nga ginhimo.
Ginpahayag man ni Edgar nga ginkastigo ini ni Arnel sadto rason nga ginbuno sini ang biktima.
Nagpanugyan si Villasario sa publiko nga indi magpadala sa kainit sang ulo kag kun mag-inum ibutang ang alcohol sa tiyan kag indi sa ulo.
