Wala sang dalagko nga mga insidente nga narekord ang Commission on Elections sa nagapadayon nga voter’s registration sang Commission on Elections sa bug-os nga Negros Island Region (NIR).
Suno kay Commission on Elections-Negros Island Region (COMELEC-NIR) Director Atty Lionel Marco Castillano, kalabanan sa mga nagaparehistro ang mga bag-o nga botante.
Suno kay Castillano, ang may pinakadako nga turnout sang mga registrants amo ang probinsya sang Negros Occidental, sunod ang Negros Oriental kag probinsya sang Siquijor, kun sa diin indi apektado ang mga registrants sa plano nga pagpaiway sang Barangay kag Sangguniang Kabataan Elections sa bulan sang Desyembre 2025 kag pagpatigayon sini sa bulan sang Nobyembre 2026.
Ang voter’s registration nagsugod sang Agosto 1 kag magatapos sa palaabuton nga Agosto 10 subong nga tuig.
Liwat ginapahanumdom ni Castillano wala ginabaton sang Comelec ang application para sa pagsaylo sang botante halin sa isa ka barangay padulong sa isa ka barangay ukon halin sa isa ka local government unit kag magasaylo sa isa ka lugar.
Samtang ginpahayag man sini nga bisan pa nga mapirmahan sang presidente ang postponement sang piniliay sa December 2025 may yara gihapon sang magakwestyon sa Korte Suprema kag isa na diri si Atty. Macalintal, nga isa sa kilala nga constitutional lawyer sa Pilipinas.
Suno diri, kun indi magpagwa sang temporary restraining order ang Korte Suprema mapadayon ang mga ini sa voter’s registration bangud luyag sang mga ini nga mangin handa.
