Makaligad sang kapin walo ka bulan, makapauli na bwas ang mga nag-evacuate gikan sa Barangay Ilijan, Bago City sang mag-alburuto ang Bulkan Kanlaon sang Disyembre nakaligad nga tuig.
Sa interview sang Bombo Radyo Bacolod kay Bago City Disaster Risk Reduction and Management Office Head Dr. Merijene Ortizo, ang mga Internally Displaced Persons (IDP) gikan sa Bago City ang ginabug-usan sang 22 ka pamilya ukon 81 ka indibidwal.
Ang mga ini ang una nga ginhamtang sa evacuation center, tubtob nga gintukod ang “Payag sang Kapag-on,” ukon ang mga Bahay Kubo nga ginbakal sang City Government agud mangin temporary settlement.
Suno kay Ortizo, idul-ong na nila bwas ang mga evacuees kag sila ang magabayanihan sa pagrepair sang mga pamalay.
Magluwas sa Bago CDRRMO, may iban pa nga mga ahensya kag pribado nga sektor nga maga-upod kag magabulig.
Paathag ni Ortizo nga sang ginpakadtuan nila ang mga balay para sa assessment, nagkalabuslot na ang mga atop sang mga balay bangod sa ashfall sang Bulkan Kanlaon.
Ang Bago City Government ang magahatag man sang roofing materials kaangay sang galvanized iron sheets, kag financial assistance nga P10,000 kada pamilya para sa ila liwat nga panugod.
Bululigan man nila ang pagtukod sang balay para sa mga pumuluyo nga wala nagid sang mabalikan nga puluy-an.
Nagbulig man bisan ang mga pribado nga indibidwal paagi sa ginlunsyar nga ‘adopt a home’ initiative.
Samtang ipabilin lamang ang Payag sang Kapag-on agud nga magamit inkaso may mga pumuluyo nga kinahanglan i-evacuate.
