Arestado ang 25 anyos nga lalaki nga nagbuno-patay sa iya tiyo bangod sa pagpangimon sa Prk San Miguel, Brgy Sum – Ag, Bacolod City, sang Lunes, alas- 9:00 sang aga.
Ang biktima ang ginkilala nga si Mabini Mombay, 44 anyos samtang ang suspect naman nga hinablos sini amo si John Pual Castillo.
Sa interview sang Bombo Radyo Bacolod kay Police Captain Andy Ofalia, station commander sang Bacolod Police Station 9, samtang nagahigda sa folding bed si Mombay sa sulod sang balay, hinali lang nga nagsulod si Castillo kag ginbuno ang iya tiyo.
Suno diri, nag-agom sang pila ka pilas sang pagpamuno si Mombay sa nagkalain-lain nga bahin sang iya lawas.
Nagtuyo nga malagyo si Castillo apang nadakpan ini sang kapulisan kag sa karun yara na sa kustodiya sang Bacolod Police Station 9.
Pahayag ni Ofalia, nagahambal si Castillo nga may relasyon ang iya asawa kag tiyo apang ginbawi man sini ang iya pahayag.
Samtang, suno naman sa pamilya ni Castillo, siya lamang nagahambal nga may yara sang relasyon ang iya tiyo kag asawa.
