Napilasan ang isa ka Citizen Armed Force Geographical Unit (CAFGU) Active Auxiliary sa engkwentro batok sa ginabanta pito ka mga remnants sang New Peoples Army sa Sitio Balao, Barangay Tan-awan, Kabankalan City kahapon alas-4:45 sang hapon.
Sa interview sang Bombo Radyo Bacolod kay Lt. Col. Ziegfred Tayaban, commanding officer sang 94th Infantry Battalion sang Philippine Army, combat group sang 94th IB upod sa mga CAFGU members ang naka-engkwentro sang ginabanta pito ka mga NPA remnants.
Ang bayluhanay sang luthang ang naglawig naman sang 25 minutos tubtob nga napuhag na kag nagpinalagyo ang kasumpong.
Napilasan sang shrapnel sa natuo nga guya si CAFGU Active Auxiliary Regie Palata.
Suno kay Tayaban, gamay lamang ang pilas sang CAFGU kag gilayon man nga nabulong ang samad sini.
Samtang nagapati sila nga may kritikal sa bahin sang Communist Terrorist Group bangod may isa ka NPA member nga gintuwangan sang tatlo sang sila ang magpalagyo.
Sa karun padayun man ang paglagas sang mga militar kag pagtumod sa mga lugar kun sa diin ini mahimo dal-on sang mga rebelde agud mabulong.
