Indi ma-issuehan sang birth certificate kag mahatagan sang bakuna ang isa ka bata sa Shanghai, China isa ka tuig matapos ini ginbun-ag bangod nagbulagay ang iya mga ginikanan bangod lamang sa wala nag-intindihanay sa paghatag sang pangalan sa bata.
Ang mag-asawa ginkasal sang 2023 kag sunod nga tuig ginbun-ag ang ila bata nga lalaki.
Apang didto na nag-umpisa ang problema bangod wala naga-intindihanay ang mag-asawa kun ano ang ipangalan sa ila bata.
Nahibaluan nga separado nga nagpadulong ang amay kag iloy sa ospital para maparegister ang pangalan sang bata nga ila tagsa nga luyag apang ginreject ini bangod wala sila nagacomply sa insakto nga proseso.
Suno sa Pudong New Area People’s Court, importante ang birth medical certificate sang bata para malegal ang iya identity kag kun madelay ang pagproseso sang ginikanan bangod sa personal nga away, mahimo nga mangin accountable ang duha sa infrigement sang personal rights sang bata.
Nag-issue ang korte sang “Notice of Care for Minor Children,” nga nagarequire sa ginikanan nga magkooperar agud mahatagan sang birth certificate ang bata apang liwat na naman sila nga nag-away kun sin-o ihatag ang kustodiya sang orihinal nga dokumento.
Bangod sini, nagdesisyon ang korte nga ang original birth certificate temporaryo nga tagoon sang korte antes ihatag sa iloy agud maproseso sini ang mandatory household registration.
