Nagdala sang water tanker kag water filtration trucks ang pila sa mga local government unit (LGUs) sa Negros Occidental nga nagpadala sang rescue kag medical team agud magbulig sa mga biktima sang 6.9 nga linog sa Cebu.
Sa interview sang Bombo Radyo Bacolod kay Office of the Civil Defense – Negros Island Region Director Donato Sermeno III, una na nga nagpadulong sa Cebu ang 13 ka rescue kag medical team gikan sa Talisay City nakaligad nga duha ka adlaw.
Kagab-i naglakat naman ang team gikan sa Escalante kag Victorias City nga naka-abot sa Cebu kaina sang aga.
Ang Silay, Sipalay, San Carlos kag Sagay City ang naglakat man subong nga adlaw samtang ang Negros Occidental Provincial Disaster Risk Reduction and Management Office ang nagpadala man sang team subong nga hapon.
Suno kay Sermeno, ang Victorias City ang nagdala sang water filtration system kag water tanker samtang may water tanker man nga ginpadala ang Cadiz City
Ala-1:00 subong nga hapon, ang One Negros Response Team ang nagpadala naman sang masobra 30 ka mga personnel.
Sa interview sang Bombo Radyo Bacolod kay Provincial Disaster Risk Reduction and Management Office Head Irene Bel Ploteña, kaupod nga ginpadala ang duha ka mobile water filtration, isa ka ambulance, isa ka rescue truck kag duha ka utility vehicle.
Ang team nga ginpadala ang ginalakipan sang magamanage sa water filtration trucks, mga Emergency Medical Services ukon medical team kag support groups.
Suno kay Ploteña, sila ang magacheck-in sa Incident Command Post sa Bogo City, Cebu kag didto na mabatun sang instruction kun sa diin ideploy agud makabulig.
