Pormal na nga nagfile ang Bureau of Internal Revenue (BIR) sang kaso nga tax evasion batok sa mag-asawa nga Sarah kag Curlee Discaya, matapos matukiban ang ginaalegar indi pagbayad sang tax nga nagadangat sa masobra P7.1 billion.
Personal naman nga ginfile ni BIR Commissioner Romeo Lumagui Jr. ang reklamo sa Department of Justice (DOJ) kahapon sang aga, kadungan sang pagfile man sang kaso batok sa isa ka corporate officer sang St. Gerard Construction Gen. Contractor and Development Corporation, kun sa diin konektado ang Discaya couple.
Suno sa BIR, nagwa sa ila research nga may dalalagko nga tax deficiencies ang kumpaniya kag mga opisyales sini lakip na ang wala gindeklarar nga ginansya kag indi insakto nga pagfile sang tax returns.
Ang ini nga tikang ang kabahin sang mas ginpasanyog nga kampanya sang ahensya batok sa dalalagko nga tax evaders sa pungsod.
