Todo practice na ang all girl group nga magaperform sa battle of the bands sa patigayunon nga Handog ng Bombo Radyo kag Star FM sa Masskara Festival 2025: Concierto sa Plaza sa Miyrekules, Oktubre 15.
Sa interview sang Bombo Radyo Bacolod kanday Jewel Loban, Bassist kag Radiance Oñas, drummer sang Vios Band, ang pangalan sang ila banda ang gikan man sa Voice Idol Of Sagay (VIOS) nga ila gina-intrahan.
Ang ila banda ang ginabug-usan sang pito ka miyembro kun sa diin sanday Jewel kag Radiance ang parehas nga 17 anyos kag grade 11 students.// Pahayag sang mga ini nga sila nga duha upod sa drummer kag keyboarder ang nagtukod sang banda, nga lunsay mga performers man sa Voice Idol Of Sagay.
Anom ka beses naman sila nga nakapasakop sa mga battle of the bands kun sa diin ulihi na kuntani nila nga intra sa kompetisyon sang nakaligad nga Negros Panaad Festival, apang sila ang gin-offeran sang ila manager sa pagpasakop sa Concierto sa Plaza.
Nakalab-ot naman sila sa pagperform sa Iloilo, Negros Oriental kag nanarisari nga banwa kag ciudad sa Negros Occidental.
Aminado ang Vios band nga sila ang masami gina-under estimate bangod all girls ang miyembro.
Apang ipakita nila nga masarangan man nila maghatag sang mabug-at nga performance.
Suno sa duha ‘expect the unexpected’ sa ila mangin performance.
Sa karun, adlaw adlaw sila nga nagapractice sa balay ni Radiance, kag sila nga mga minors ang gina-updan gid sang ila mga ginikanan sa kada performance bilang pagsuporta.
Luwas sa battle of the bands, ang vios ang may performance man sa iban pa nga aktibidad sang Masskara Festival 2025.
Samtang, first time nga magapasakop sa battle of the bands ang TMZ / Left Over Band.
Sila ang kbahin sa contenders sa Handog ng Bombo Radyo kag Star FM sa Masskara Festival 2025: Concierto sa Plaza, ‘battle of the bands.’
Sa interview sang Bombo Radyo Bacolod kay Nok Tejada, band guitarist, aminado ini nga sila ang nakulbaan sa kompetisyon nga patigayunon sa Miyerkules, Oktubre 15 sa Bacolod City Public Plaza alas-6:00 sang gab-i.
Suno kay Tejada, siya ang orihinal nga miyembro sang banda, samtang ang iban sini nga kaupod ang gikan na sa nagkalainlain nga grupo.
Sila ang lunsay mga residente sang Barangay Mansilingan, Bacolod City.
Suno diri, acoustic lamang ang masami nila nga kanta kun sa diin may tion nga may mga nagacontact sa ila nga mag-gig sa mga bar.
Apisar nga ini ang ila first time sa battle of the bands, nagapangagda si Nok nga bantayan ang ila performance.
