Nakuha sang Barangay Tangub ang championship sa Masskara Festival 2025 Arena and Street Dance competition-Barangay Category.
Nagdaog ang mga ini sang P1 million nga grand prize magluwas pa sa iban nga special awards kaangay sang Most Disciplined, Best in Music, Best in Theme and Content kag Best in Mask and Costume nga may tig-P50,000 nga premyo.
Nakuha man sang Barangay Tangub ang 2nd place sa Merry Making kag nakabaton sila sang P20,000.
Ang Choreographer sang Barangay Tangub amo si Joedem Casabuena nga Choreographer man sang Barangay Granada nga wala nagpasakop subong nga tuig matapos nga mag-grandslam sa nagligad nga mga tinuig.
Ulihi nga nangin champion ang Barangay sang 2018 pa, kag sang tinalikdan nga tuig sila ang first runner-up.
Nangin 1st runner-up naman ang Barangay Bata kag nakakuha sang P500,000 cash prize.
Sila ang 3rd place sa Merry Making, nga nakabaton sang P10,000, kag nakakuha man sang special award nga Best in Introduction nga may cash prize nga P50,000.
Samtang second runner-up ang Barangay 29 nga nakabaton sang P300,000.
Sila ang champion sa Merry Making kag nakadaog sang P30,000, kag Community Dance champion sa premyo nga P50,000.
Napulo ka mga kabarangayan sa ciudad sang Bacolod ang nagperform nga ginlakipan sang Barangay Handumanan, Barangay 21, Barangay 39, Barangay Tangub, Barangay 6, Barangay 29, Barangay Bata, Barangay 13, Barangay 11 kag Barangay 7.
