Generally peaceful ang assessment sang Bacolod City Police Office sa natapos lang nga 47th Masskara Festival.
Suno kay BCPO Director Police Col Joeresty Coronica, iya gin-athag nga wala sang insidente sang kinawatay nga nagluntad bangod ginpanas ang una nga report nga may pickpocket incident nga natabo sang nakit-an ang nadula nga cellphone.
Suno diri, wala man sang nagluntad nga mga major incidents kag malinong man wala sang kinagamo.
Samtang, gindayaw man sini ang tanan nga trabaho sang kapulisan nga nakumpiskar ang milyones nga balor sang shabu antes pa man magamit sa Masskara festival.
Ginpasalamatan naman ni Police Regional Office-Negros Island Region (PRO-NIR) Regional Director Police Brig Gen. Arnold Thomas Ibay ang tanan nga nagbulig kag nagsuporta nga natapos nga malinong ang Masskara Festival.
Suno kay Ibay, iya ginapasalamatan ang Armed Forces of the Philippines (AFP), Bureau of Fire Protection (BFP), Bureau of Jail Management and Penology (BJMP), kag Philippine Coast Guard (PCG).
Iya man ginpasalamatan ang force multipliers, volunteers, City Disaster Risk Reduction and Management Office (CDRRMMO), City Health Office (CHO), rescue units, Brgy tanod, traffic enforcers kag tanan nga nagsuporta.
Ginpanginbulahan man sini ang tanan para sa isa ka meaningful nga selebrasyon kag luyag sini nga mapabilin sa tanan ang mensahe sang One City, One Smile kag One Heart. Samtang….dako ang pagpasalamat ni Bacolod City Mayor Greg Gasataya nga wala sang ano man nga dalagko nga insidente sa Masskara Festival 2025.
Suno sa alkalde naapresyar sini ang trabaho sang tanan nga nangin matawhay ang selebrasyon.
Dugang pa sini, bisan madali lang ang preprasyon, nangin madinalag-on ang mga activities bisan pa nga nag-ulan sang Sabado.
Pahayag ni Gasataya, nakabaton siya sang manami nga feedback sa natapos lang nga selebrasyon.
