Ginalauman ang pag-abot sang resulta sa autopsy sa bangkay ni Freya Mae Go subong nga adlaw.
Sang Miyerkules, nasapwan ang bangkay sang 17 anyos sa kahilamunan sa Barangay 12, Bacolod City nga nakabaklid, may gapos ang kamot kag wala na sang pang-idalom nga panapton.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 1, kahapon sang aga nagpadulong ang iloy ni Freya nga si Sarah sa Police Station 1 kag nagpasugot nga ipa-autopsy ang bangkay sang iya bata samtang sang hapon naman nag-abot ang amay sini nga si Joselito Go nga nag-esturya na sa kapulisan kag nagbisita sa bangkay sang iya bata sa punerarya.
Suno diri, sa pag-esturya sini kay Joselito may ginhatag ini nga pangalan sang lalaki nga mahimo amo ang may kahimuan sang krimen.
Suno kay Depasucat, sa karun may yara na sila sang duha tubtob tatlo ka persons of interest apang ginavalidate pa ini samtang nagapadayon ang imbestigasyon.
Nagpangayo naman sila sang request sa mga establishemento nga mahimo may yara sang CCTV footage kun diin ulihi nakit-an si Freya kag kun sino ang kaupod sini ukon bala may gintabo siya.
Ginpanawagan ni Depasucat kun sin-o man ang nakahibalo kun ano ang natabo kay Freya kag nagpasalig nga indi magkahadlok agud mahatagan na sang hustisya ang natabo sa 17 anyos nga biktima.
