Kaniya kaniya na sang pagpaminsar sang himuon nga mga pakulo para sa Halloween season, kag ang iban mahimo nagapinsar na nga mangprank gamit ang makahaladlukan nga costume.
Apang handa ka bala sa ano man nga mahimo konsekwensya sang imo buhaton?
Kaangay lamang sa Virginia, USA, kun sa diin na-record sa isa ka doorbell camera sang isa ka pamilya ang tatlo ka tawo nga nagasul-ob sang makahadlukan nga costume.
Nagtawag sang kapulisan ang tawo sa balay agud ma-imbestigahan ang makaduluda nga mga persona sa kahangawa nga sila ang mga kawatan.
Suno kay Alexandria Police Chief Tarrick McGuire, natukiban sang mga imbestigador nga ang tatlo ka tawo amo ang mga teenager nga lalaki nga anak sang naga-istar mismo sa balay.
Nahibaluan nga ang mga teenager ang ginbuligan sang tatlo ka adults nga miyembro man sang pamilya kag isa pa ka bata.
Ginpahayag ni McGuire, sang ginahimo ang prank, isa ka himata nga yara sa sulod sang balay ang nagpinsar nga posible sila ang magpangawat ukon maghimo sang krimen gani gilayon ini nga nagcontact sa isa pa nila nga paryente nga nagkadto sa ila balay dala ang armas-luthang.
Ginpaathag ni McGuire nga bisan pa wala sang peligro nga nadulot ang prank mahimo ini nga magresulta sa komplikasyon.
Pahanumdom sini nga dapat mangin leksyon ini sa tanan nga pumuluyo ilabi na sa tion sang holiday.
Samtang, wala sang kaso nga ginpasaka may kaangtanan sa imbestigasyon.
