Ginpahayag sang City Director sang Bacolod City Police Office nga Oktubre 29 pa lang nagdeploy na sila sang mga police personnel sa 15 ka mga private kag public cemeteries sa ciudad sang Bacolod agud masiguro ang matawhay kag malinong nga obserbasyon sang fiesta minatay subong nga tuig.
Sa interview sang Bombo Radyo Bacolod kay Police Col. Joeresty Coronica, personal sini nga ginlibot kahapon ang sementeryo sa ciudad agud nga tsekyaron ang deployment sang mga police personnel kun nasunod ang deployment plan.
Suno kay Coronica, naobserbahan sini nga nagdamo ang mga nagapadulong sa pasahero kag matawhay lang man bangud indi lang police ang nadeploy sa mga sementeryo bangud may yara sang katapo sang Bureau of Fire Protection, Disaster Risk Reduction Management Office kag iban pa nga ahensya sang gobyerno.
Ang deployment sang mga police personnel amo ang sa police assistance desk kag may yara man sang nagarobing sa sulod sang sementeryo.
Kalakip sang mga ginpangdeploy ang yara sa opisina agud masiguro nga may nagakaigo nga numero sang mga kapulisan nga magabantay para sa malinong kag matawhay nga obserbasyon sang fiesta minatay.
Wala man ini sang nabatian nga mga reklamo bangud ang mga patakaran ang una na nga ginpahibalo sa publiko kag wala na sang rason nga supakon pa.
Ini nga mga patakaran ang gindihon agud nga masiguro nga secure kag matawhay ang obserbasyon sang UNDAS 2025.
