Ginkasubo sang gobernador sang probinsya sang Negros Occidental nga nagdangat sa 16 ang numero sang nagkalamaytay samtang 31 naman ang missing bangod sa Bagyo Tino.
Sa interview sang Bombo Radyo kay Governor Eugenio Jose ‘Bong’ Lacson, iya ginakasubo nga target kun tani sang probinsya nga wala sang casualty apang nagdangat sa 16 ang nabawian sang kabuhi.
Suno diri, duha ang nasapwan nga napatay sa banwa sang Murcia nga iya sang lalaki kag ginabanta duha ka tuig nga bata; sa ciudad sang San Carlos tatlo ka babayi ang nalunod; tatlo sa ciudad sang Bago nga ginalakipan sang duha ka babayi nga naga-edad sang 48 kag 18 anyos kag 7 anyos nga bata nga natumbahan sang puno sang duldol; pito sa banwa sang La Castellana kag isa sa ciudad sang La Carlota.
Suno sa gobernador, iban sa mga biktima nakilal-an na kag kalabanan napatay matapos malumos.
Samtang, 31 naman ang namissing kag ginalauman sini nga nakakita sila sang pamaagi nga masalbar ang ila kaugalingon.
Nagdangat naman sa masobra 104,000 ka mga indbidwal ang gin-evacuate sa bilog nga probinsya.
Napaggwa naman sang probinsya ang mga water tankers kag padayon ang pagpanagtag sang food packs sa mga evacuees.
Pahayag ni Lacson, konsultahon pa sini ang Sangguninag Panlalawigan kun ipaidalum sa state of calamity ang probinsya kasunod sa nangin halit sang bagyo.
Samtang, nadesisyonan nga ikansela ang selebrasyon sang Al Cinco de Noviembre ukon Negros Day bangud sa epekto sang bagyo Tino.
