Napabay-an nga kandila ang rason sa duha ka sunog nga nagluntad sa ciudad sang Bacolod.
Sa interview sang Bombo Radyo Bacolod kay Fire Superintendent Jenny Mae Masip, fire marshal sang Bacolod City Fire Station, napabay-an nga kandila ang rason sa sunog nga nagluntad sa Prk Riverside, Brgy Banago sang Miyerkules sang gab-i kun sa diin 15 ka mga balay ang apektado, siyam ang totally damaged kag anum ang partially damaged kag nagdangat sa kapin P100,000 ang balor sang halit.
Samtang, kasubong man nga unattented lighted candle ang rason sa sunog nga nagluntad sa Purok Paghidaet, Barangay Tangub kahapon sang kaagahon.
Suno kay Masip, lima ang totally damaged kag duha ang partially damaged kag nagdangat sa kapin P75,000 ang balor sang halit.Suno diri, lunsay yara sa red zones ang mga area kag ang mga balay human sa light materials.
Pahayag ni Masip, mas maayo nga maggamit sang emergency light ukon battery operated nga mga suga sang sa kandila apang kun maggamit gid man sang kandila dapat maghalong gid.
Samtang, may sunog man nga nagluntad sa Luzuriaga St kun sa diin ang ginhalinan naman amo ang generator set.
Suno kay Masip, kun maggamit sang generator set dapat nabutang ini sa gwa sang balay kag indi pagpabay-an nga ma-over heat.
