Gintugyanan na sang gobernador sa Negros Occidental ang mga local government units sa pagpreparar sa pagpatuman sang preemptive evacuation karun nga may mga lugar na nga napaidalom sa Wind Signal No. 1 bangod sa Typhoon UWAN.
Sa interview sang Bombo Radyo Bacolod kay Negros Occidental Provincial Administrator Atty Rayfrando Diaz, panawagan sini sa mga Negrense nga magsunod kun may-ara sang panugyan ang mga Barangay officials sa pag-evacuate partikular na sa mga low-lying kag disaster-prone areas.
Pahayag ni Diaz nga kadam-an sa mga napatay kag namissing ang nagsalig nga indi magbaha, gani pahanumdom sini nga mas maayo kun nagapangaman agud segurado nga makasalbar.
Panawagan sini sa pumuluyo nga magkadto na lamang sa evacuation centers kag nagapasalig ang provincial government nga sila ang magapadayun sa pagsuporta.
Tubtob sa karun, wala untat ang pagpamutos sang mga rescue personnel kag volunteers sa Provincial Disaster Risk Reduction and Management Office sang mga foodpacks nga ginapadala sa mga evacuation centers.
Nagdangat na sa 7,700 ang family foodpacks nga ila nadul-ong kahapon sa 21 ka mga banwa kag ciudad.
May-ara naman sang mga trucks nga nagdul-ong sang adisyunal para sa subong nga adlaw, kag luwas sa foodpacks, sila ang nagadul-ong man sang tubig kag hygiene kits.
Paathag ni Diaz nga ang mga yara sa evacuation centers anay ang ila prayoridad nga mahatagan sang foodpacks, apang nagalaom ini nga masunod naman bisan ang mga yara lamang sa ila pamalay apang nahalitan man.
Samtang, may mga nagapanawagan man sa ila sang tubig paagi sa DRRM hotline, nga ila na lamang ginapahapitan sa mga ginadeploy nga water tankers.
