21 ang kabug-usan nga mga bangkay nga naretrieve sa banwa sang Moises Padilla tuga sang pagpanghalit sang Bagyo TINO.
Sa interview sang Bombo Radyo Bacolod kay Moises Padilla Disaster Risk Reduction and Management Office Head Reynald Horegue, sa 21 ang 12 ang kumpirmado nga residente sang Moises Padilla kag naclaim na sang pamilya, may duha nga wala pa makilala, samtang ang pito ang gikan sa iban nga local government units.
Suno kay Horegue, tatlo ang ulihi nila nga recoveries kahapon, kun sa diin sila ang temporaryo nga nag-untat sa search and retrieval operation, kag nagresume na lamang alas-2:00 subong nga hapon.
Sa pito nga gikan sa iban nga LGUs, ang apat ang residente sang Canlaon City, Negros Oriental samtang ang duha ang gikan sa banwa sang La Castellana.
Ang mga ini ang naanod sa suba, tubtob makadangat sa ila nga lugar.
Samtang ang mga tumandok sa ila nga banwa nga narecover ang kalabanan gikan sa Barangay Inolingan, Moises Padilla.
Samtang suno kay Horegue, iverify pa nila ang impormasyon nga may isa ka nasapwan nga ginpalubong sang pamilya kag wala makuhaan sang record.
Kalabanan sa mga narecover nga bangkay ang hublas na bangod sa pagka-anod sa mabaskog nga baha.
Ang mga ini ang yara naman sa advance stage of decomposition gani indi na makilala sa ila nga nawong.
Apang masami sa mga pamilya nga nagaclaim sa mga bangkay ang may mga palatandaan sa lawas sang ila himata kaangay sang mga singsing kag iban pa.
Samtang wala man natapos sa mga kasubaan ang ila nga search and retrieval operations, kundi ginahusoy sang mga ini kutob sa makita nga mga lugar nga ginlabayan sang baha, kalakip na ang mga kampo nga nagkalahapay.
Panugyan sini sa mga pamilya nga may missing pa nga himata nga magcontact sa ila ukon magpadulong nalang mismo sa Punerarya Nalagon kun sa diin ginadala ang mga marecover nga bangkay.
