Tuman ang kabudlayan nga nagaka-eksperyensyahan sang mga residente sang Sitio Tabidiao, Barangay Mailum, Bago City matapos maguba ang taytay nga ila gina-agyan para makatabok.
Sang Nobyembre 4 sa paglaslas sang bagyo Tino nagtaas ang tubig sa suba tubtob nga naguba kag naanod ang taytay.
Bangod sini, may temporaryo nga gintukod nga taytay kun sa diin ang mga residente manaog sa hagdan nga kawayan kag matabok sa suba sa taytay nga kawayan kag masaka naman sa hagdan nga kawayan tubtob nga makalab-ot sa pihak.
May ginbutang man nga kalat nga ginahigtan sang mga dalal-on sang mga residente kag ini ginabutong sa pihak para mapatabok.
Samtang, bangod indi safe ang hagdan kag taytay para sa mga kabataan nga magtabok, gina-aba sang mga ginikanan ang ila bata kag ginahigot sa ila lawas agud indi mabudlay magsaka kag manaog sa hagdan.
Sa interview sang Bombo Radyo kay Linda Marcelo, ang mga kabataan sini nagapuyo sa Talisay City apang nagapabilin ini sa Bago City sa pagbantay sa iya mga kasapatan kag mga pananom.
Suno sa 70 anyos nga residente, humalin pa sadto didto na siya nagapuyo kag nagatrabaho lamang sa kampo agud makakwarta.
Suno pa diri, pila na ka baha ang naglabay apang sa karun pa lamang siya nakakita sang tuman ka taas nga baha nga naglab-ot sa mga balay sa ila lugar.
Sa karun, amat-amat na ini nga nagapangita sang materyales agud mapakay-o ang iya naguba nga balay.////
