President Bongbong Marcos, nagalaom nga mangin “nation of promise” ang Pilipinas

Nagalaum si Presidente Ferdinand Marcos Jr. nga ang Pilipinas ang mangin “nation of promise” sa panulok sang mga Pilipino kag investors.

Nahibaluan nga nagtambong ang presidente sa 50th Year Anniversary sang Hongkong and Shanghai Banking Corporation (HSBC) sa ciudad sang Taguig, kahapon, Nobyembre 18.

Ginpahayag sang Presidente nga padayon ang kooperasyon sang publiko kag pribado nga sektor agud nga mapasanyog ang ekonomiya sang Pilipinas kag mapakita ini bilang “nation of promise.”

Ginpasidunggan sini ang kontribusyon sang HSBC sa ekonomiya lakip na ang ila nga suporta sa bond issuances nga nagabulig sa mga programa sang gobyerno sa imprastraktura, edukasyon kag social protection.

Ginpahayag man sini ang importansya sang kolaborasyon sang HSBC sa Board of Investments kag sa Philippine Economic Zone Authority (PEZA) nga naga-enganyo sang global investors kag nagahatag sang mas madamo nga oportunidad sa Filipino workforce.

Ginpasiguro ni Marcos nga ang iya administrasyon ang magapadayon sa pagpabaskog sang financial system sang pungsod.