Mabuhinan ang benepisyo sang mga persons deprived of liberty (PDL) nga nakuhaan sang suspected shabu kag iban pa nga kontrabando sa sulod sang Negros Occidental District Jail Male Dormitory.
Sa interview sang Bombo Radyo Bacolod kay Jail Senior Inspector Atty Juniven Umadhay, head sang legal service section kag spokesperson sang Bureau of Jail Management and Penology – Negros Island Region, may mga narecover nga suspected shabu sa ginpatigayon nila nga greyhound operation sang Nobyembre 18 kag 20.
Sa operasyon sang Nobyembre 18, sila ang nakarecover sang isa ka sachet sang suspected shabu, lima ka cellphone nga ginalakipan sang apat ka smartphone kag isa ka keypad, kag duha ka improvised bladed weapon.
Sang Nobyembre 20, may narecover naman ang mga ini nga duha ka sachet sang suspected shabu, isa ka cellphone charger kag isa ka iphone.
Ang mga kontrabando ang nakuha sa hiligdaan sang inmates, apang suno kay Umadhay, wala pa natumod ang tag-iya bangod indi man permanente ang pwesto sang mga priso.
Suno kay Umadhay, kun mapamatud-an nga shabu ang mga recoveries, ang mga matumod nga tag-iya ang mangatubang sang kaso sa paglapas sa Republic Act 9165 ukon Comprehensive Dangerous Drugs Act of 2002.
Mabuhinan man ang benepisyo sang mga ini gikan sa Good Conduct Time Allowance, ang layi nga nagabuhin sang sentesya sang mga PDLs kun sila ang makapakita sang maayo nga pamatasan kag nagasunod sa mga pagsulundan sang jail facility.
