163 ka mga benepisyaryo sang Tulong Pang-hanapbuhay sa Ating Disadvantaged/Displaced Workers (TUPAD) program sang Department of Labor and Employment (DOLE) ang gindeploy agud magpatigayon sang clearing kag declogging sa mga kalog sa Dalan Lacson, Bacolod City.
Sa interview sang Bombo Radyo Bacolod kay Punong Barangay Paul Anieve sang Brgy Mandalagan, Bacolod City, ang mga TUPAD beneficiaries ang magatrabaho sa sulod sang 10 ka adlaw, apang sa lainlain nga area kada adlaw.
Nagalaom ini nga masalama ang mga kalog sa Brgy Mandalagan antes matapos ang napulo ka adlaw.
Ginpa-utod man sini ang mga nagkalatumba nga kahoy sa Purok Mahirup Carvic, bangod natalana man nga magpatigayon sang flushing activity si Mayor Greg Gasataya.
Madumduman nga nangin tuman ka taas ang tubig baha sa Purok Mahirup Carvic sang maglabay ang Bagyo Verbena.
Suno kay Anieve, ang walo ka major creeks ang sa nagapagwa sang tubig padulong sa creek sa Prk Carvic.
Bangod diri nagatipon ang tubig, nagasupon ang mga madala nga mga kahoy kag basura nga nagatuga sang pag-awas sang suba.
Samtang aminado man si Anieve nga may mga bahin sang suba nga sadto tatlo ka metros ang kadalumon, apang sa karun duha ka metros na lamang bangod sa siltation.
Dugang pa sini nga sa evaluation sang ciudad, natumod nga may mga napatay nga suba bangod gintampukan ukon wala na ginpalabayan sang tubig kadungan sa pagtukod sang mga buildings.
Nagalaom si Anieve nga paagi sa clearing sang mga water ways, mapahagan-hagan na ang baha.
Diri man matumod ang papel sang basura sa madasig nga pagsaka sang tubig-baha sang tinalikdan.
