Ginalauman nga magdangat sa kapin 12,000 ka mga tawo ang magapartisipar sa patigayonon nga TAMA NA march rally, Kontra Korapsyon, Kontra Baha sa ciudad sang Bacolod.
Sa interview sang Bombo Radyo Bacolod kay former Negros Occidental Governor Rafael “Lito” Coscolluela, spokesperson sang Taong Bayan Ayaw sa Magnanakaw at Abusado Network Alliance (TAMA NA)- Negros, pila ka adlaw nila nga ginpreparahan ang patigayonon nga rally kag tinguhaan nila nga mangin organisado kag wala sang may magluntad nga kinagamo sa rally.
Suno diri, ginalauman nga kapin 12,000 ang magapartisipar bangod sa pag-upod sang nagkalain-lain nga parishes sang simbahan Katoliko, youth sector, students, urban poor, fisherfolks, labor sector, transport sector, One Negros Ecumenical Council (ONEC) kag iban pa.
Suno kay Coscolluela, ang grupo nga gikan sa Northern Negros Occidental ang magatipon sa Bangga Pepsi sa Brgy Bata, Bacolod City kag macaravan padulong sa Capitol lagoon.
Samtang ang grupo naman gikan sa Southern Negros Occidental ang magatipon sa Araneta Street sa Bangga Cegasco kag macaravan padulong sa Lupit Church.
Sila tanan masuksok sang puti nga tshirt kag may puti nga ribbon kag matipon sa atubang sang Replica sa Bacolod City Public Plaza .
Samtang, nagpahanumdom man ini nga may yara sang road closure nga patigayonon sa Gonzaga Street kag Araneta St.
Pahayag ni Coscolluela, ila ginapanawagan nga mauntat na ang indi maagwanta nga korapsyon sa gobyerno, transparency sa gobyerno kag dapat nga mapanabat ang tanan nga may sala.
