Nagdangat sa 7,798 ang mga ginpanagtag nga land titles, P1.79 billion naman ang gingrant nga debt condonation kag P73.6 million ang ginhatag nga support packages sa madamo nga mga Agrarian Reform Beneficiaries sa Negros Island Region.
Ang distribusyon sang Department of Agrarian Reform – Negros Island Region (DAR-NIR) sa Manuel Y. Torres Memorial Coliseum and Cultural Center sa Bago City, Negros Occidental subong nga adlaw ang ginpangunahan mismo ni Agrarian Reform Secretary Conrado Estrella III.
Sa interview sang Bombo Radyo Bacolod sa tiglikom, ginpasalig ni Estrella nga ubuson nila ang mga kinahanglan nga ipanagtag nga duta antes matapos ang termino ni President Ferdinand “Bongbong” Marcos Jr. sa 2028.
Ang mga duta nga gin-award sa 4,788 ARBs sa NIR ang nagadangat sa 5,524 hectares gikan sa Negros Occidental, Negros Oriental kag Siquijor.
13,822 ka ARBs naman ang nagbatun sang 15,000 nga Certificates of Condonation with Release of Mortgage (COCROMs), nga naghilway sang P1.79 billion nga wala nabayaran nga land obligations sa Negros Oriental.
Balor P67.6 million naman ang ginturn-over nga farm machinery, equipment kag inputs sa 71 ka Agrarian Reform Beneficiary Organizations (ARBOs).
Lakip diri ang 40 ka 115 Horse Power nga traktora, cargo trucks, solar-powered irrigation pump, mini-tractors kag 13,500 ka sako sang organic fertilizer.// Ini ang ginalantaw nga makabulig sa ginabanta 4,200 nga ARBs.
Naghatag man sang P6 million nga relief assistance ang DAR para sa 5,913 nga mga indibidwal, nga ginalakipan sang 5,675 nga ARBs kag 238 nga DAR personnel nga nahalitan sang Bagyo TINO kag UWAN.
Panawagan ni Estrella nga indi untatan kag itudlo sa mga kabataan ang nagakaigo nga pagpanguma gamit ang mga makabag-o nga mga makenarya.
Pahanumdom sini nga ang food security ang katumbas sang national security.
Suno diri, kun wala na sang magpanguma, mapilitan ang pungsod nga magsalig sa importasyon tubtob nga kita ang magaluhod na lamang sa iban nga pungsod.
