Patay ang 34 anyos nga lalaki matapos ginluthang sang duha ka wala makilal-an nga persona sa Purok Sab-a, Brgy. Montilla, Moises Padilla, Negros Occidental, kahapon alas- 5:00 sang hapon.
Ang biktima ang ginkilala nga si Alias Joseph nga residente sang Sitio Balunggay, Brgy. Montilla, Moises Padilla.
Sa initial nga imbestigasyon, ang biktima nagasakay sa iya nga motorsiklo papauli sa ila balay sa Sitio Haroy, Brgy. Montilla apang sa pag-abot sa Sitio Sab-a, may duha ka lalaki nga nagpara sa iya.
Nanaog si Joseph sa iya nga motorsiklo kag ginpalapitan ini sang mga suspetsado.
Hinali nga ginluthang sang isa ka suspek si Joseph sa natuo nga ilok.
Gilayon naman nga nagpalagyo ang mga suspetsado.
Gindala pa sa Moises Padilla District Hospital si Joseph apang gindeklarar nga dead on arrival.
