Wala gihapon sang pamilya nga nagpalapit sa Philippine Coast Guard Station Northern Negros Occidental angot sa namising nga Negrense sa baybayon sang Caticlan, Aklan.
Nahibaluan nga si Danilo Villaluz, 53 anyos ang nagbyahe gikan sa Batangas kag padulong kuntani sa Negros Occidental agud bisitahon ang iya bata sa banwa sang Isabela.
Sa interview sang Bombo Radyo Bacolod kay Lt Junior Grade John Hofer Olis, spokesperson sang PCG Northern Negros Occidental, wala pa sila sang nabatun nga koordinasyon gikan sa iban nga Coast Guard units nga nagapatigayon sang search and rescue operations kasubong man wala sang pamilya nga nagpalapit sa ila.
Bangod sini, wala sang record nga may missing sa probinsya gani sila ang indi man makapatigayon sang search operation.
Suno diri, ang area kun sa diin hinali nga nadula si Villaluz ang sakop sang iban nga PCG units gani sila man ang may mandato sa pagpangita diri.
Apang ang PCG Northern Negros Occidental ang magabulig man kun may-ara sang mando kag kun may magreport nga pamilya nga ini ang missing.
Sa facebook post sang bata sang biktima, ang ila amay ang nacontact pa nila samtang yara sa barko kag ini ang naglisensya nga magatulog.
Apang humalin sadto, wala na nila liwat macontact ang biktima tubtob nga nasapwan na lamang ang mga pagkabutang sini kaangay sang bag.
Sa announcement sang PCG Central Office, padayun ang ginapatigayon nga search and rescue operation agud makita si Villaluz.
