Nagapanawagan ang Water Watch Negros sang transparency gikan sa PrimeWater Inc. nga yara sa idalom sang Joint Venture Agreement sa Bacolod City Water District.
Sa interview sang Bombo Radyo Bacolod kay Wennie Sancho, convenor sang Water Watch Negros, ang mga water consumer ang wala nagapili kun sin-o man ang service provider sang BACIWA basta ini lamang masulit ang malawig nga nangin pag-antos gikan sa PrimeWater sang tinalikdan.
Nahibaluan nga ginbakal na sang Crystal Bridges Holding Corporation sang Lucio Co Group ang PrimeWater.
Ginakwestyon sini kun ngaa apisar nga yara sa JVA, ang BACIWA ang wala napahibalo sang pagbaligya sang ila partner company, sa baylo ang nakahibalo lamang amo sanday Bacolod City Lone District Congressman Alfredo “Albee” Benitez kag Bacolod City Mayor Greg Gasataya.
Panindugan ni Sancho nga dapat ipaathag sa publiko kun ano na matabo sa pagtake-over sang bag-o nga PrimeWater owner.
Suno diri, indi magasaway ang Water Watch kun maayo lamang ang serbisyo sang PrimeWater, kag indi man sila kumpormi nga ginsudlan na sang politika ang BACIWA.
Pahayag pa sini nga dapat magbutang sang spokesperson ang PrimeWater, bangod ang mga nagakakuha nga sabat gikan sa kompanya ang gikan na lamang sa mga announcement sang alkalde kag kongresista.
Sa nagakatabo, nagakadulaan naman suno diri sang purpose ang Board of Directors sang BACIWA, nga representante sang mga konsumedor.
Panawagan man sini kay Councilor Bobby Rojas, chairperson sa Committee on Energy and Public Utility nga iduso sa PrimeWater nga makapatigayon sang public hearing.
Pahanumdom ni Sancho nga public document ang JVA.
Ginakatingala man sini kun ano ang nagahigot sa alkalde kag kongresista kasubong man sa BACIWA Board of Directors kun ngaa indi gid nila materminate ang kontrata sa PrimeWater apisar sa indi mapuslan nga serbisyo.
Pasalig sini nga ang Water Watch ang wala nagapamalabag sa bag-o nga management sang PrimeWater, apang sila ang nagapanawagan nga magpagwa sang pledge ukon commitment ang Crystal Bridges sa paghatag sang mas maayo nga serbisyo.
