Pormal na nga ginpadala sang Senate Committee on Ethics and Privileges kay Senador Ronald “Bato” Dela Rosa ang reklamo nga gin-file batok sa iya may kaangtanan sa madugay na sini nga indi pagtambong sa mga opisyal nga katungdanan sa Senado kag siya ang ginhatagan sang 15 ka adlaw humalin sa pagbaton sang abiso agud magsumiter sang iya sabat.
Ginpahibalo ni committee chair Senator Vicente “Tito” Sotto III kay Dela Rosa nga napasar na sa form and substance requirements ang reklamo sang civil society group nga Wag Kang KuCorrupt matapos sila nagsumiter sang mga supplemental affidavit, kag ginkumpirmar nga napadala na ang pormal nga abiso sa talatapan sang senador.
Nag-ugat ang kaso sa reklamo nga gin-file sang Pebrero 25, sang nasambit nga grupo nga ginapamunuan ni anay Finance Undersecretary Cielo Magno, kun sa diin ila ginpahayag nga ang padayon nga pag-absent sang senador samtang nagabaton gihapon sang sweldo naggikan sa pondo sang mga Pilipino ang maathag nga pagpabaya sa serbisyo kag pag-abuso sa pribilehiyo.
Angot diri, naghingyo ang senado nga pamatbatan sang nagakaigo nga sanction si Dela Rosa kag i-suspender ang iya bulanan nga sweldo santo sa “no work, no pay” principle.
Bangud sa record sini nga 31 absences sa sulod sang 58 ka adlaw nga sesyon sa una nga regular session sang 20th Congress, ginkakas kay Dela Rosa ang halos tanan sini nga posisyon sa komitiba sang Senado sang Pebrero 2026, kag makadali lamang nga nagpakita sa plenaryo sang Mayo agud magboto sa pag-ilis sang liderato.












