Isa ka bangkay ang nasapwan sa kampo sang tubo sa Hda Bernabe, Brgy Salvacion, Murcia alas-9:00 sang aga.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, ang bangkay ang nakalubong apang may bahin nga nagalabaw sa duta nga nagaka-agnas na, nga nakit-an kapin 10 ka metros gikan sa highway.
Ini ang ginreport sang tapasero sang tubo.
Sa karun wala pa sang identity sang bangkay kag ginpaproseso na sa punerarya.
Ang lugar kun sa diin nasapwan ang biktima ang 2-3km gikan sa proper kun maglabay sa bag-ong dalan.
Wala naman sang missing persons sa nasambit nga banwa.
Samtang sa nakuha nga impormasyon sang Bombo News Team gikan sa imbalsamador, ginpahayag sini nga lalaki ang biktima.
Ini ang may kataason naman nga 71 inches ukon 5-foot-11.
Wala naman sang panapton ang bangkay, samtang intact pa ang panit sini sa bahin nga nalubong sa duta, apang ang na-expose sa hangin ang na-agnas na.
Sa pagbanta sang imbalsamador, yara sa masobra 40s ang pang-edaron sang biktima.
