Ginpaidalom na sa heigthened alert status ang Philippine Coast Guard sumugod subong nga adlaw Disyembre 20, 2025 tubtob na sa Enero 4, 2026.
Sa interview sang Bombo Radyo Bacolod kay Lt Jr Grade John Hoffer Olis, public information officer sang Coast Guard Station Northern Negros Occidental, sila ang magadeploy sang dugang nga mga personnel sa mga pantalan bangod sa ginalauman nga influx sang mga pasahero.
Dugang pa nga nagsugod naman ang bakasyon sang mga estudyante, gani mas madamo na ang nagabyahe.
Sa pagtsekyar sang Bombo News Team sa BREDCO Port kapin alas-7:00 sang aga, nakita nga madamo na sang mga pasahero nga may dalo sang madamo nga mga bagahi
Ini bangod gina-antisipar na ang pagpauli ukon pagbakasyon para sa nagahilapit nga paskwa kag bag-ong tuig.
Luwas sa mga PCG personnel, may mga ginadeploy man nga katapo sang Bureau of Fire Protection kag kapulisan, kag may ara man sang K9 units agud magtsekyar sang mga bagahi.
May ginahamtang man sila nga Malasakit Help Desk sa kada pantalan, kag may-ara man sang nakastandby nga makahatag sang medical assistance.
Sila ang naga-inspect man sang mga barko, kag pasalig ni Olis nga wala sang tugutan nga makalayag nga wala sang manifesto.
Ang PCG ang magapatigayon man sang visibility patrol sa mga baybayon.
Samtang ginatsekyar man nila kun nagatuman sa safety requirements ang mga resorts nga kaladtuan gid sang mga bakasyonista
