Patay ang Russian Lieutenant General nga si Fanil Sarvarov matapos maglupok ang isa ka bomba nga ginbutang sa idalom sang iya salakyan sa Moscow, kahapon.
Ini ang ginpahayag sang spokesperson sang Russia’s Investigative Committee nga si Svetlana Petrenko.
Nahibaluan nga si Sarvarov, 56 anyos, amo ang pinuno sang operational training department sang armed forces.
Suno sa imbestigasyon sang mga otoridad, ini ang may involvement sang Ukrainian intelligence, apang wala pa sang opisyal nga pahayag halin sa Ukraine.
Makita sa mga litrato halin sa lugar ang isa ka puti nga salakyan nga naguba ang mga pwertahan sa sulod sang isa ka parking lot malapit sa apartment block sa amo nga lugar.
Sa pihak nga bahin, nagpasaka na ang mga otoridad sang kaso nga murder kag illegal trafficking sang mga may kahimuan sang krimen.
Kilala si Sarvarov bangud sa iya mga combat operation sang Ossetian-Ingush conflict kag sang Chechen wars sang 90s kag unang bahin sang year 2000s.
Isa man siya sa mga nanguna sa mga operasyon sa Syria sang 2015 tubtob 2016.
Suno sa Kremlin, ginpahibalo gilayon kay Russian President Vladimir Putin ang pagkamatay ni Sarvarov.
Nahibaluan nga halin sang ginsugodan sang Russia ang full-scale invasion sa Ukraine sang Pebrero 2022, may pila na ka opisyal sang militar nga nangin target sang car bomb sa Moscow.
