Nagpaandam ang Bacolod City Health Office nga maghalong sa pagselebrar sang paskwa para sa ikaayong lawas.
Sa interview sang Bombo Radyo Bacolod kay Dr Grace Tan, head sang Environment and Sanitation Division sang Bacolod City Health Office, nagpaandam ini nga maghalong sa pagselebrar sang holidays ilabi na sa pagkaon sang mga handa.
Suno diri kun may pagkaon nga dapat ginapabilin nga cold, dapat ini isulod sa refrigerator samtang kun may pagkaon naman nga mainit pa, mas maayo nga indi ini pagtakloban gilayon agud indi madasig nga mapan-os.
Dugang pa sini, kun madamo sang ginpreparar nga pagkaon, dapat siguraduhon nga maubos ini kag indi pagpalawigon pa sang masobra apat ka oras agud masudlan sang bacteria.
Suno kay Tan, indi man manami nga pila ka beses nga initon ang pagkaon ilabi na kun indi man lang mainit sang husto.
Ginpahanumdom man sini nga dapat hugasan sang husto ang mga ingredients sa pagluto kag siguraduhon nga malimpyo ang tubig nga ginagamit.
Pahayag ni Tan, likawan ang paggamit sang firecrackers kag siguraduhon nga ang mga torotot kag hampanganan nga ginagamit kag ginhatag sa mga kabataan, nakaregister sa DTI bangod iban nga produkto may chemicals nga toxic para sa lawas.
