Nagpalab-ot sang Christmas message si Vice President Sara Duterte para sa mga Pilipino, sa kun paano mangin masinadyahon ang pagselebrar sang paskwa sa tunga sang madamo nga ginaatubang nga mga kabudlayan sa kabuhi.
Suno kay VP Sara, sa tion sang paskwa ginapalibutan ang aton nga mga tagipusuon sang mga grasya nga nagikan sa pagkatawo ni Hesus.
Ginpahayag sini nga mas mangin meaningful ang Christmas spirit kun ang mga grasya ang ginapakigbahin man sa isigkatawo ilabi na sa mga nagakinahanglan.
Ginpaathag sang Bise Presidente, ang importansya sang pagbulig sa mga pigado, may mga balatian, wala sang puluy-an, sa mga biktima sang mga kalamidad kag mga sektor nga nagakapabay-an.
Suno diri, ang kamaayuhan nga nagikan sa tagipusuon amo ang magahatag sang paglaum, kusog kag pagtuo sa Diyos, kag amo man ang magagiya kag magpabaskog bilang mga indibidwal, bilang pamilya kag bilang isa ka pungsod.
Gindugang pa niya nga importante gid nga padayon nga ipangamuyo ang kalinong kag kalig-on para sa Pilipinas.
Ginsabat ni President Ferdinand Marcos Jr. sa iya nga vlog ang pila ka mga pamangkot sang mga katawhan may kaangtanan sa pagselebrar sang paskwa.
Isa na diri ang pamangkot kun dapat baka batunon ang ginhatag nga regalo apisar nga ini ang wala ma-uyunan.
Suno sa presidente, bisan indi mo luyag ang nabaton nga regalo, dapat ini batonon nga may pagpasalamat bangod halin ini sa tagipusuon sang naghatag kag ini ihatag sa iban nga mas makabenepisyo.
Ginpahayag man sini nga mas mahapos na subong nga maghatag sang regalo paagi sa digital wallets.
Ginpahanumdom man sini sa tanan nga halungan ang kalawasan ilabi na sa sini nga tion nga madamo sang mga manamit nga pagkaon kag mga ilimnon, agud mangin malipayon kag matahum ang selebrasyon sang Paskwa.
